اخواتي في أسرة برنامج لمسات شافية

أنا عندي مشكلة وهي إني اتجوزت من سنة ونص ومعايا طفل.. حصلت مشاكل بيني وبين جوزي ، ومسكني ضربني وأهانني ، وأنا دلوقتي في بيت والدي..السبب في المشاكل دي انه بيسمع كلام والدته وماشي وراها في كل حاجة.. كل شوية يقولوا لي انهم جايبني من الشارع ويشتموني بأسوأ الألفاظ.. أنا وسّطت أهلي وأهل الخير علشان يصلحوا بيننا، لكنهم اكتشفوا انه معندوش شخصية.

تتصوروا زوج بيقول انه هيرشي اتنين شباب يجوا عندي في البيت علشان يمسكوني معاهم وبكده يقدر يكسب قضية الطلاق..

احنا دلوقتي ماشيين قصاد بعض في المحاكم . هو رفع على محضر اهمال علشان خايف على ابنه ( علماً بأن القضية دي عقوبتها الحبس والغرامة) .. وأنا رافعة عليه قضية نفقة علشان يصرف عليّ أنا وابني لأن والدي هو اللي بيصرف علينا.

عاوزة أقول لكم ان الجوازة دي كانت غلط من الأول ، لأننا كنا مخطوبين وحصلت مشاكل بيننا ، وقتها طلبت من والدي اننا نفك الخطوبة لكن والدي ووالدتي رفضوا ، وقالوا ان الناس هتقول أكيد خطيبي سابني علشان فيّ عيب ، ومحدش هيرضى يخطبني بعد كده ، وهو ده السبب اللي خلاني أوافق على الجواز. أنا ندمانة على الجوازة دي .

أرجو منكم انكم تردوا عليّ بسرعة علشان أنا تعبانة من اللي بيحصل لي ومش عارفة أعمل إيه!!

إمضاء/ الحزينة على حظها